المساعد الشخصي الرقمي

مشاهدة النسخة كاملة : لقاء مع مسئول الحلقة الثانية



Moon14
08-22-2008, 08:33 PM
بسم الله الرحمن الرحيم

المذيعة: عودة للمسئول العظيم اللي يقدر يعمل كل حاجة في البلد وهو قاعد على كرسيه هنا معانا.. عشان بس عايزين نعرّف الناس ان الحكومة دي مظلومة وانهم مفتريين وبيستهبلوا.. نرجع ونكلم حضرتك عن موضوع شاغل الرأي العام فترة طويلة خالص وهو موضوع العبارة الى غرقت
المسؤول: غرقت ايه وهو انتي بتصدقي الكلام ده؟

المذيعة:

همّ بيقولوا كده

المسؤول: هفهمك انا الموضوع كله، حضرتك عارفة فيلم تايتانك؟
المذيعة:


اه ليوناردو دي كابريو كان اموور اوي في الفيلم بصراحة

المسؤول: اهو الموضوع كله ان ممدوح سليمان
المذيعة:


ممدوح اسماعيل يافندم

المسؤول: اه معلش.. حضرتك الفيلم ده كسر الدنيا وجاب عائد مادي ضخم جداااا فممدوح اسماعيل حب يعمل فيلم مصري خاص عشان يجيب عائد مادي لمصر.. فخرّب العبارة بتاعته.. الراجل الحق عليه عشان اما تغرق يصورها ونعمل فيلم مصري عالمي.. بس ده كل الموضوع
المذيعة:


طب يافندم في ناس بيقولوا ان في ناس ماتت بجد

المسؤول: ياستّي الاعمار بيد الله
المذيعة:


بس المفروض ان ممدوح اسماعيل يعوّضهم

المسؤول: وهو في بعد تعويض ربنا؟
المذيعة:


طب هو فين الفيلم ده يافندم؟

المسؤول: للأسف الشديد المصور وهو بيصور الفيلم غرق.. فبالتالى مفيش فيلم من اصله
المذيعة:


يعني ممدوح اسماعيل كان عايز يعمل فيلم عالمي زي تايتانك

المسؤول: زي ما بقولك كده
المذيعة:


وبالتالى اعزائي المشاهديين احنا كده عرفنا قد ايه احنا ظلمنا الراجل

نعود بعد الفاصل في برنامجنا حوار مع السيد المسؤول
*******
:: فاصل :::
http://t.farok.1.googlepages.com/T480.jpg
*******
المذيعة: احنا ممكن نستقبل اتصالات دلوقتي.. يافندم حضرتك مستعد تفتح صدرك للمواطنين وتسمعهم
المسؤول: طبعا طبعا انا تحت امر المواطنين
المذيعة: نقول الو
المواطن: الو سلامو عليكم
المذيعة: وعليكم السلام اتفضل يااستاذ
المواطن: انا بس كنت عايز اقول للسيد المسؤول ان انا ابني في المعتقل بقاله 12 سنة ومعرفش عنه حاجة انا بس عايز اعرف هيخــ
......
المذيعة: ألو ألو.. واضح ان الخط اتقطع
المسؤول: فعلا واضح ان الخط اتقطع.. حضرتك شديدة الملاحظة
المذيعة بكسوف شديد: ميرسي جدا يا فندم ده بس من ذوقك.. بس هو كان بيسأل عن ابنه اللي في المعتقل بقاله 12 سنة
المسؤول: هو كان بيقول معتقل ولا اتنقل؟
المذيعة: لا انا سمعتها معتقل
المسؤول: وانا سمعتها اتنقل.. هو انتو هتسمعوا احسن من الحكومة؟
المذيعة بوش اصفر وخلاص هيغمى عليها: لا يافندم وهيّ دي تيجي؟ هو فعلا قال اتنقل.. اتنقل من شغله لشغل تاني وبعد ما حالة اتظبط ساب العيلة اللي كان عايش فيها
المسؤول: اه انا سمعت كدة برده
المذيعة: و بكده تكون خلصت حلقتنا أنهاردة


و أستنونا فى حلقة جديدة مع السيد المسئول


هترودوا ولا :CrazeIcon-013:

أنتوا عارفين :Do5_012:

كونان
08-22-2008, 08:46 PM
ههههههههههههههههه
جميله جدا
على فكره انا كمان سمعت انه اتنقل بس مش للوظيفه ولكن لل........
هههههههههههه
انا مش هكمل احسن اتنقل معاه

A7med Baraka
08-22-2008, 08:52 PM
ياااااه على المذيعين دول :D

محتاجين يسلكوا ودانهم هههههه

أنا أتفرجت على الحلقة و سمعت الراجل بيقول أتنقل بس الخط قطع و ده ذنبه هو طبعا ليه ما يجيبش أشتراك تليفون ما بيقطعش هههههههه

جامدة يا moon14

radwa fat7y
08-22-2008, 10:12 PM
انا بقة مش بخاف وهقول الحقيقة الرجل اللى اتصل دة كان بيقول ان ابنة ا اااااااااااااااا

اتنقل طبعا واحنا يعنى هنسمع احسن من الحكومة هههههههههههههههه لا طبعا دة الحكومة دى احسن

حكومة ف الدنيا مريحة الشعب اخر راحة ولو حد اشتكى بتريحة برضة بس الراحة الابدية اللى

ميشتكيش بعدها ابداااااااااااااااااا ربنا مش يكتبها لنا ههههههههههه احنا حلوين كدة

المهم بجد توبيك لذيذ وشكلى كدة هدخل المنتدى كتييييييييييييير ولا انتا اية رأيك يا بركة:



جامدةجدااااااااااااا يا

moon14






[SIZE="3"] You like to work, but you always want a break.
You are very open-minded.
.[/SIZE

A7med Baraka
08-22-2008, 10:58 PM
تنورينا طبعا يا رضوى
أحنا نفسنا تدخلى المنتدى و تشرفينا على طول ;)

Moon14
08-27-2008, 03:46 AM
شكرا ليكم كلكم و لردودكم

بس فين باقى الناس ولا بتقرأ و بتمشى من غير ولا كلمة شكر و لا تشجيع حتى

galaxy
09-12-2008, 05:11 AM
حلقة جمييييلة اووووي
بس ليه مفيش اعلانات
هو البرنامج ملوش جمهور وللا اييه
؟؟؟؟؟؟؟؟؟؟؟؟؟؟؟؟؟