خايف ألتزم..
End Google Ads 201810 - BS.net 01 -->((إِنَّ الَّذِينَ قَالُوا رَبُّنَا اللَّهُ ثُمَّ اسْتَقَامُوا تَتَنَزَّلُ عَلَيْهِمُ الْمَلَائِكَةُ أَلَّا تَخَافُوا وَلَا تَحْزَنُوا وَأَبْشِرُوا بِالْجَنَّةِ الَّتِي كُنتُمْ تُوعَدُونَ ))فصلت30
فربنا تعالى بشر عباده الذين رضوا به ربا وأمنوا به ، وأستقاموا على تعاليمه ، بشرهم بالجنة وحسن المئاب ، يعنى المفروض منكنش مؤمنين بالاسم، فاللهم أرزقنا الالتزام وأجعلنا من عبادك الملتزمين يارب العالمين.
وكتير مننا ، بفضل الله وعونه ، سمع عن ربنا ، وأتعرف على كرمه وعدله ولطفه بعباده ، وكمان عقابه وعذابه ، وقلوب كتير مننا متأثرة بالدين، ونفسها تلتزم بتعاليم ربنا وبمنهجه ، بس المشكلة فى ...خايف ألتزم..ودى كلمة فى لسان كتير مننا ، مع أختلاف الاسباب من شخص لأخر.
تعالوا نفتح قلوبنا لبعض ، ونقطع الاتصال بالدنيا ، حتى نساعد بعض للوصول بإذن الله تعالى إلى بر الأمان ، فى هذا المشهد الجميل ، اللهم لا تحرمنا أن نكون بينهم...
قال تعالى
((يَوْمَ تَرَى الْمُؤْمِنِينَ وَالْمُؤْمِنَاتِ يَسْعَى نُورُهُم بَيْنَ أَيْدِيهِمْ وَبِأَيْمَانِهِم بُشْرَاكُمُ الْيَوْمَ جَنَّاتٌ تَجْرِي مِن تَحْتِهَا الْأَنْهَارُ خَالِدِينَ فِيهَا ذَلِكَ هُوَ الْفَوْزُ الْعَظِيمُ ))الحديد12
ونبدأ بسم الله...بالاسباب المختلفة ، اللهم ارزقنا التوفيق والسداد
خايف ألتزم لحسن أكون مش قدها و أرجع تانى وأكون فتنة لغيرى...طيب أنت عرفت منين إنك هترجع تانى ، يترى بتعلم الغيب؟؟
وبعدين فين ثقتك فى ربنا وتوكلك عليه !!
، فأنت عليك البداية وعليه هو التمام،
وبعدين ربنا قالنا إن اللى هيتعب شوية ويجاهد شهواته ، هيحس فى الاول بالتعب وبالمجاهدة ، وبعدين لما ربنا يشوف مدى إخلاصه وصدقه ، هيسرله كل الطرق إليه.
.قال تعالى
((وَالَّذِينَ جَاهَدُوا فِينَا لَنَهْدِيَنَّهُمْ سُبُلَنَا وَإِنَّ اللَّهَ لَمَعَ الْمُحْسِنِينَ))
العنكبوت:69
ياااااااه ، يالله ، قد أيه أنت كريم ، بتهدينا وتيسرلنا وكمان بتجازينا على أعمال ، جلالك وحده هو اللى يسرلنا ذلك..اللهم لك الحمد والشكر
وبعدين لو بتقول إنك مش قدها ،
طيب امتى هتبقى قدها؟ واللى ألتزموا دول أحسن منك فى إيه؟؟؟
أنت مش نفسك يحبك ربنا ، ربنا بيعطى الفلوس والعربيات والمناصب وغيرهم لمن يحب ومن لا يحب ، ولكن يعطى الهدايه لمن يحب فقط.
اللهم أجعلنا ممن تحب وأهدنا لما تحب وأجعلنا من عبادك الصالحين.
أثبت وأحسن الظن فالله ، فاللى مع ربنا ، ربنا مش ممكن يسيبه ، يسيبك إزاى وهو معاك فى كل حتة،
قال تعالى ((وَهُوَ مَعَكُمْ أَيْنَ مَا كُنتُمْ وَاللَّهُ بِمَا تَعْمَلُونَ بَصِيرٌ))
.
وكل ما توسوس لك نفسك أو حد من أصحابك ويقلولك كلها يومين وترجع ، قول كما قال موسى عليه السلام
قال تعالى
62الشعراء((((قَالَ كَلَّا إِنَّ مَعِيَ رَبِّي سَيَهْدِينِ
.:.:.:.
سبب تانىالملتزم فى مجتمعه شعاع نور إن لم يستطع الشيطان إطفائه سلط عليه أصحابه.
..بس صلى على النبى الاول...أنا خايف ألتزم لحسن أصحابى يتريقوا عليا ويعدوا دايما يفكرونى بالذى مضى، هقولك أنت بتلتزم علشان ربنا ، مش عشان أصحابك ، وفين بقى ثقتك فى نفسك وأعتزازك بدينك ، لأن أصحابك اللى بيتريقوا دول مش بيعملوا حاجة صعبة ، أى حد يقدر يتناول مخدرات ويكلم بنات ويعمل كل الذنوب ، وكتير قبلهم عمل اللى بيعملوه ، يعنى هما مش بيخترعوا الذرة ، لأن الشيطان بيساعدهم على كده ، لكن الهداية دى والله شرف وعزة وكرم ليك من ربنا ، وأعرف إن أصحابك كلهم نفسهم يبقوا كويسين بس مش عارفين ومش عايزين مؤقتا ، وعلشان يرضوا ضميرهم يعدوا يتريقوا عليك ، علشان يحسسوا نفسهم إنهم اللى صح وانت اللى غلط ، وهما واثقين إنهم هما اللى غلط ، وبعدين كلها فترة وهتلاقيهم هما اللى بيقلولك متسبناش وخدنا فى طريقك ، وحط العبارة دى فى دماغك
خليك راجل وعندك شخصية وكون أنت القائد للخير ، ماحنا ياما كنا قواد فى الغلط ، اللهم أغفر لنا وأرحمنا ، وخلى شعارك كما قال شيخنا محمد حسن يعقوب ، بارك الله فيه وفى اهله ، أثر ولا تتأثر
تابعونا في الحلقة القادمة
رد مع اقتباس
مواقع النشر (المفضلة)